Et fortem validumque combibonem
Lætantem super amphora repleta ;
Jucundissimus omnium fereris,
Nullique artificum secundus, ætas
Quos præsens dedit, aut dabit futura.
Macte o, eia age, macte sis amicus
Virtuti: vitiique quod notâris,
Pergas pingere, et exhibere coram.
Censura utilior tua æquiorque
Omni vel satirarum acerbitate,
Omni vel rigidissimo cachinno.
PLUS SCIRE OPORTET, QUAM LOQUI.
QUÆ gravitas oculis! et quæ constantia fronti!
Sobrius ut toto pectore bubo sapit !
Ales Pythagora dignus, dignusque Minerva !
Sermonis parcus, consiliique tenax!
Oh habitet tecum, bubo, et sit pectore in isto,
Quicquid habes: quoties effluet, omen erit.
NON ES, QUOD SIMULAS.
ANTE focum nutatque et lumina claudit herilem
Et stupida, et vultu seria, felis anus:
Nil ea lascivi saltus meminisse videtur;
Lusus, si spectes, nil juvenilis habet;
Sed grave, sed prudens quamvis, castumque tuetur,
Caudam, cum tempus fert, agitare potest.
OCEANUS PRÆDATOR ET RESTITUTOR.
ABLUIT Oceanus terras hinc inde jacentes;
Excavat et ripas, subtus edendo, salum.
neque contrahitur tellus subducta rapinis,
At neque fit furtis auctior unda suis.
Nam parte ex alia desertam extendit arenam
Littus, et e mediis insula crescit aquis.
Nil prodest lucrum, cui damna æqualia fines
Oceanus mutat, sed superare nequit.
PLUMASQUE, et pilos, et muscum hinc colligit illinc,
Fætibus ut nidum sedula sternat avis:
Quos ubi surreptos cavea suspendit arator,
Hic quoque captivos provida mater alit.
Si muscam, si vermem affert, vel forte cicadam,
Totus hiat nidus, conqueriturque famem.
Infelix in utroque parens! labor est peperisse,
Et labor est pullos non peperisse sibi.
OMNI ANTIQUIUS, NULLI USPIAM LI
BRORUM INSERTUM CATALOGO.
EXIGUUS liber est, muliebri creber in usu,
Per se qui dici Bibliotheca potest.
Copia verborum non est, sed copia rerum ;
Copia (quod nemo deneget) utilior.
Rubris consuitur pannis; fors texitur auro;
Bis sexta ad summum pagina claudit opus.
Nil habet a tergo titulive aut nominis; intus
Thesauros artis servat, et intus opes:
Intus opes, quas nympha sinu pulcherrima gestet,
Quas nive candidior tractet ametque manus.
Quando instrumentum præsens sibi postulat usus,
Majusve, aut, operis pro ratione, minus.
Et genere et modulo diversa habet arma, gradatim
Digesta, ad numeros attenuata suos:
Primum Enchiridii folium majuscula profert,
Qualia, quæ blæso est lumine, poscat anus.
Quod sequitur folium, matronis arma ministrat,
Dicere quæ magnis proximiora licet.
Tertium, item quartum, quintumque minuscula sup-
Sed non ejusdem singula quæque loci.
Disposita ordinibus certis, discrimina servant;
Quæ sibi conveniant, seligat unde nurus.
Ultima quæ restant, quæ multa minutula nympha
Dicit, sunt sexti divitiæ folii.
Quantillo in spatio doctrina o! quanta latescit !
Quam tamen obscuram vix brevitate voces.
Non est interpres, non commentarius ullus,
Aut index; tam sunt omnia perspicua.
Ætatem ad quamvis, ad captum ita fingitur omnem,
Ut nihil auxilii postulet inde liber.
Millia librorum numerat perplura; nec ullum
Bodlæi huic jactat Bibliotheca parem.
Millia Cæsareo numerat quoque munere Granta,
Hæc tamen est inter millia tale nihil.
Non est, non istis auctor de millibus unus,
Cui tanta ingenii vis, vel acumen inest.
ENTIUM INCORPOREORUM COLLIGI
POTEST LUMINE NATURÆ.
OMNIA mortali demens sapientia credit
Semine concreta, et cæco jactata tumultu
Principia innumeras rerum procudere formas:
Hinc animam fingit nascentibus insinuatam
Corporeas servare vices, unaque vigere
Cum membris, una languentem flere vigorem,
Atque brevis pariter spatium decurrere vitæ,
Et simul in cineres primævaque semina solvi.
Hos ludos, Epicure, atque hæc insomnia ridet
Inventrix veri ratio, sedesque futuras
Monstrat, perpetuamque animæ post funera vitam.
Nam si corporeæ pereunt cum corpore mentes,
Unde est, quod cœco resoluti carcere manes
Aërias sumunt formas, et tenuia membra,
Et similes referunt vultus, notasque figuras?
|